Patay ang anom ka mga indibidwal, lakip ang suspek sa isa ka insidente sang pagpangluthang sa isa ka mercado sa Bangkok, Thailand.
Suno kay Charin Gopatta, Deputy Commissioner sang Metropolitan Police Bureau, lima sa mga biktima amo ang mga security guard sang merkado.
Ginkumpirmar sang otoridad nga ang suspek nga nagpangluthang amo man ang napatay matapos ginpatay niya mismo ang iya kaugalingon.
Ginalantaw pa sang mga imbestigador ang motibo sang suspek sa paghimo sang amo nga krimen.
Suno kay Sanong Saengmani sang Bang Sue District, wala sang turista nga napatay ukon nasamaran sa insidente.
Ang nasambit nga mercado ang kilala bilang lugar sang baligyaan sang mga produkto nga agrikultural.
Ang turismo isa ka daku nga bahin sang ekonomiya sang Thailand, gani posible nga may epekto sa kumpiyansa sang mga turista kag investors ang sining trahedya.
Sa isa ka video nga ginpagwa sang mga otoridad, makita ang suspek nga nagasuksok sang puti nga kalo kag may backpack samtang nagalakat sa paradahan sang merkado.
Hindi na bag-o sa Thailand ang mga insidente nga kaangay sini nga may kaangtanan sa armas.
Sang Oktubre 2023, isa ka 14-anyos ang nagluthang gamit ang improvised nga pusil sa isa ka mall, nga nagresulta sa kamatayon sang duha ka tawo.
Sang nagligad nga tuig, isa ka anay pulis ang nagtiro kag nagpamatay sang 36 ka tawo, upod ang 22 ka kabataan, sa isa ka nursery sa sidlangan nga bahin sang pungsod.
