Gin-athag ni Antique Governor Rhodora Cadiao nga bag-o pa man ang kampanya ni presidential candidate vice president Leni Robredo sa Antique, naka-set na ang iya appointment sa Manila para sa iya tambungan nga duha ka kasal.
Ini ang kasunod sang nagalapta nga alegasyon nga wala nagtambong ang gobernadora sa kampanya ni VP Leni bangud si Ferdinand ‘Bongbong’ Marcos Jr. ang ginasuportahan sini sa pagka-presidente.
May nagalapta man nga alegasyon nga wala ginpahanugutan ni Governor Cadiao si Robredo nga makasulod sa kapitolyo sang Antique kag ginapahayag nga ginsugo pa niya ang mga alkalde nga indi man magtambong sa political campaign ni VP Leni.
Sa interview sang Bombo Radyo kay Cadiao, iya ginpahayag nga wala sang kamatuoran ang ginahaboy nga mga alegasyon batok sa iya.
Suno sa gobernadora, bisan wala siya sa Antique sa tion sang kampanya ni Robredo, ginmanduan niya ang iya nga staff nga akomodaron gid ini.
Indi man matuod suno sa iya nga ginsiraduhan niya ang kapitolyo bangud ang tanan nga staff niya yara didto.
Sa isyu naman kun nga-a wala sang alkalde nga nakatambong sa kampanya ni Robredo, gin-athag ni Cadiao nga base sa panaysayon sang mga Mayor, may mga personal ang mga ini nga rason kag ang iban naman may ginasuportahan man nga iban nga kandidato sa pagka-presidente.
Pahayag ni Cadiao, matuod man nga ginasuportahan niya ang kandidatura ni Bongbong Marcos apang wala ini nagakahulugan nga mangguba siya sa iban nga kandidato.
Dugang pa sang gobernadora, kinamatarong niya nga magpili kag magdesisyon kun sin-o ang iya suportahan sa eleksyon kag wala siya sang may ginakomiter nga krimen kun sin-o man nga kandidato ang iya nga botohon.
