Ginmultahan na naman sang National Basketball Association (NBA) ang 23-anyos nga star guard sang Minnesota Timberwolves nga si Anthony Edwards.
$35,000 ukon P2.03-million ang gindagdag nga penalidad sa iya matapos wala gilayon nagguwa sa court sang ginpahalin ini sa hampang kag ginhaboy pa sini ang bola sa stands.
Ini na ang iya ika-anum nga multa subong nga season.
Kun sumahon, nagdangat na sa $320,000 ukon P18.54-million ang penalty sini sa liga subong gid lamang nga season nga nagalakip man sa foul sini nga lenggwahe sa media interviews kag ang ginakabig “bastos” nga gestures samtang yara sa court.
Ang latest penalty sang three-time All-Star guard ang nag-ugat sa ikaduha sini nga technical foul sa hampang batok sa Los Angeles Lakers sang nagligad nga semana kag ginpahalin sang singko minutos na lang ang nabilin sa third quarter.
Bangud sa amo man nga foul, awtomatiko siya nga gin-suspend sa hampang batok sa Utah Jazz kun sa diin nalutos man ang Wolves.
Amo man ini ang iya ika-16 na nga technical foul subong nga season.
Base sa patakaran, sa kada duha ka dugang nga technical fouls, magasaka man ang iya nga suspension sa isa pa ka game.
Gin-ako man ni Minnesota Coach Chris Finch nga gin-istorya naman sang team si Edwards nga dapat nga kaayuhon sini ang panimuon sini sa court.
“He’s got to be better,” suno sa coach. “He’s had too many outbursts. I think a lot of them are deserved. They’re going to miss some calls from time to time for sure, so he’s got to be better, and we’ve been talking to him about it. So it’s on him.”
Sang nagligad nga bulan, nauna na si Edwards sa pagpromisa nga indi na ini mag-angkon sang dugang nga technical fouls.
