ILOILO CITY – Mas ginpasangkad pa sang Republic Act 11313 ukon ang Safe Spaces Act kag mas kilala nga Anti Bastos Law ang Republic Act 7877 ukon ang Anti-Sexual Harassment Act of 1995.
Ang Anti Bastos Law ang ginpirmahan ni Presidente Rodrigo Duterte sang Abril 17, 2019 kag nangin layi sang Agosto 3 sang amo man nga tuig.
Sa interview sang Bombo Radyo kay Atty. Benjo Clarite, hepe sang San Jose de Buenavista Municipal Police Station sa probinsya sang Antique, iya ginpahayag nga ang Anti Bastos Law ang ginhimo agud nga mapalapad pa ang mga provision sang Anti-Sexual Harassment Act of 1995.
Sa Anti-Sexual Harassment Act, limitado lamang ang gender-based harrasment sa eskwelahan, training center kag sa workplace apang sa Safe Spaces Act, mahimo nga makasuhan ang indibidwal nga nagapang-harass ukon nagapangbastos sa iban pagid nga mga pampubliko nga lugar kag mangin sa internet.
Suno pa kay Clarite, kun ang akto sang isa ka tawo sa imo ang indi mo magustuhan kag daw kaangay nga bastos na para sa imo, mahimo gid nga mag-file sang kaso.
Yari ang mga akto sa mga pampubliko nga lugar kag sa internet nga mahimo makasuhan sang Safe Spaces Act:
pagdayaw kag pagpanihol sa isa ka tawo nga may dala nga malisya ilabi na sa sekswal; pagtawag sa isa ka tawo sang mga bastos nga tinaga; pagpangsuya; pwersa nga pagkuha sang detalye sang isa ka tawo; pagtandog sa pribado nga bahin sang lawas; paghimo sang bastos nga bagay sa publiko; kag pagpamahog.
Ang penalidad sa paglapas sa nasambit nga layi amo ang anum ka bulan kag isa ka adlaw tubtob duha ka tuig kag apat ka bulan ukon magbayad sang PHP 100,000 tubtob PHP 500,000. Mahimo man nga mapreso kag magbayad pagid sang multa depende na sa korte.
