Iloilo City – Nakarekord ang Department of Education Region 6 sang 57 ka mga kaso sang bullying sa sulod sang eskwelahan sa Western Visayas para sa school year 2021-2022.
Sa interview sang Bombo Radyo kay Mr. Hernani Escullar Jr., Spokesperson sang Department of Education Region 6, iya ginpahayag nga kun pahat-pahaton ang numero, ang physical bullying ang may yara sang 23 nga kaso para kalalakihan, 9 sa kababainhan; social bullying may yara sang 5 sa kalalakihan, 4 sa kababainhan; gender based bullying may yara sang 5 sa kalalakihan, 2 sa kababainhan; cyberbullying 4 sa kalalakihan, 4 sa kababainhan; kag retaliation nga may 1 sa kalalakihan.
Suno kay Escullar, sa tion nga may mabaton nga report sang pagpang-bully ang guidance counselor, gilayon ini nga gina-untat kag ginapahibalo ang school head, ginapatawag ang mga involved kag gina-activate ang child protection unit sa eskwelahan.
May yara man sang gina-fill out ang biktima nga ‘intake sheet’ nga amo ang mangin basehan kun ano ang tikang nga pagahimuon sang ahensya.
Ginpahayag dugang sang natungdan, kun indi masarangan sang eskwelahan nga ma-address ukon mahatagan sang intervention ang bullying, gina-refer ini sa local social welfare development officers agud nga mahatagan ini sang solusyon.
Sa tion may yara sang impormasyon nga mabaton ang Department of Education nga pagpang-bully, ginahatagan ini sang prayoridad agud nga indi na magdako pa ang insidente.
Ginpasiguro man sang natungdan nga padayon ang kampanya sang ahensya agud malikawan ang bullying.
Nagpanawagan si Escullar sa mga estudyante nga indi makulbaan nga ipabalo sa mga manunudlo kun gina-bully bangud dako ang social psychological impact sini.
