ILOILO CITY – Maga-umpisa na buwas nga adlaw, Hulyo 26, ang pagpatigayon sang Anti-Dengue Orientation nga pagapangunahan sang City Disaster Risk Reduction and Management Office may kaangtanan sa Dengue Outbreak sa syudad sang Iloilo.
Sa interview sang Bombo Radyo kay Dona Magno, pinuno sang City Disaster Risk Reduction and Management Office, iya ginpahayag nga ang kick-off sang nasambit nga orientation ang patigayunon sa Brgy. Balabago sa distrito sang Jaro nga nagapangaduha sa mga barangay sa syudad sang Iloilo nga may pinakamadamu nga kaso sang Dengue Hemorrhagic Fever.
Ginpahayag ni Magno nga prayoridad sang City Disaster Risk Reduction and Management Office ang 37 ka mga barangay nga nalakip sa listahan sang mga lugar nga may yara sang clustering case sang Dengue.
May kaangtanan sa pagdeklarar sang State of Calamity sa syudad sang Iloilo, ginpahayag ni Magno nga may yara sang lima ka basehan nga ginalakipan sang numero sang Dengue cases, saka sa attack rate, high attack rate ipaanggid sa iban nga probinsya, fatality rate kag kun nalab-ot na ang epidemic threshold.
Sa subong, ang mga barangay nga nalakip sa may pinakamadamu nga kaso sang Dengue amo ang San Juan, Molo nga may 29, Balabago, Jaro nga may 25, Sooc, Arevalo nga may 21,Q. Abeto, Mandurriao nga may 20, Calumpang, Molo kag Tacas, Jaro nga may 18, Bo. Obrero, Lapuz kag Balantang, Jaro nga may 17, San Pedro, Molo kag Sambag, Jaro nga may 16, Jereos, Lapaz kag Guzman Jesena, Mandurriao nga may 15, Baldoza, Lapaz kag Navais, Mandurriao nga may 14 kag Tagbak, Jaro nga may 13.
