Aminado ang Western Visayas Transport Cooperative nga dako gid ang epekto sang ‘Anti Sardinas Policy’ sa ila nga mga pasahero.
Ang amo nga polisa ang nagadumili nga magsobra sa passenger capacity sang isa ka pampubliko nga salakyan ang mga sakay nga pasahero.
Madumduman nga mas nangin hugot ang pagpatuman sang polisa matapos nga naglapta sa social media ang video kun sa diin nagaginutok nga daw sardinas ang mga pasahero sa isa ka modernized jeepney.
Sa interview sang Bombo Radyo kay Raymundo Boyet Parcon, Chair sang Western Visayas Transport Cooperative, iya ginpahayag nga madamo sa mga pasahero ang nagapamilit pa sa gihapon nga magsakay sa ila unit bisan pa nga ginadumilian na magsulod bangud man sa kakulang sang mga salakyan.
Apang hugot man nga nagapamalibad ang mga driver kag kundoktor sa ila nga mga unit bangud man sa dako nga penalidad nga ila pagaatubangun kun sila ang madakpan.
Dugang pa ni Parcon, may ginapaabot sila nga dugang nga mga unit agud nga mahagan-hagan naman ang pagpugok sang mga pasahero ilabi na kun rush hour.
