ILOILO CITY – Ginatutukan sang Department of Agriculture Region VI ang probinsya sang Antique, ilabi na ang Hamtic kag San Jose, bangud sa nagasaka nga kaso sang African swine fever.
Ang Antique ang pinakaulihi nga probinsya sa Western Visayas nga na-igo sang nasambit nga hog disease.
Sa interview sang Bombo Radyo kay Dr. Jonic Natividad, pinuno sang Regional Task Force on African swine fever kag sang Regulatory Division sang Department of Agriculture Region VI, iya ginpahayag nga nagahulat pa sang verification ang ahensya sang blood sample sang baboy sa pila ka mga kabanwahan sang Antique nga gina-alegar may kaso sang nasambit nga balatian.
Suno kay Natividad, wala pa sang tul-id nga plano ang ahensya sa liwat nga pagpadamo sang baboy apisar nga may yara na sang pondo bangud nga may pila pa ka mga local government units nga wala nakapasa sang blood sampling para sa surveillance.
Ang surveillance ang mangin basehan kun mahimo na nga ipatuman ang repopulation ilabi na sa mga lugar nga wala sang kaso sang balatian sa sulod sang 90 ka adlaw.
Samtang, bastante pa ang suplay sang baboy sa rehiyon nga yara sa 190-200% nga sufficiency level.
