ANTIQUE – Tatlo ka mga concerns ang ipalab-ot ni Antique Governor Rhodora Cadiao kay National Action Plan Against COVID-19 Chief Implementer Sec. Carlito Galvez Jr.
Sa interview sang Bombo Radyo kay Gov. Cadiao, iya ginpahayag nga hingyuon niya kay Galvez nga i-home quarantine na lang ang mga asymptomatic nga COVID-19 patients sa Antique bangud gamay lang ang mga isolation center sa probinsya.
Suno kay Cadiao, indi naman magpatigayon sang swab test sa baylo rapid testing na lang ang himuon bangud nakabakal na ang probinsya sang P15 million nga balor sang rapid test kits.
Ika-duha nga iya ipalab-ot sa natungdan amo ang pagpahanugot sang angkas sa motorsiklo bangud ini ang “mode of transportation” sang Antique.
Kuntani pahayag niya, sa mga pagsulundan nga ginadihon sang national government, may yara man ini sang “exception”.
Ika-tatlo nga concern sang Antique amo ang pagpabilin sang curfew bangud may maayo ini nga epekto sa probinsya.
Nahibaluan nga nagpadulong subong nga adlaw si Sec. Galvez sa syudad sang Iloilo agud bisitahon ang ginaduso nga COVID-9 laboratory kag dormitory sa bahin sang distrito sang Molo.
