ILOILO CITY – Pabor si Antique Governor Rhodora Cadiao sa ginaduso ni National Economic and Development Authority (NEDA) chief Karl Kendrick Chua nga four-day work week bangud sa epekto sang padayon nga pagsaka sang presyo sang gatong sa pungsod.
Sa interview sang Bombo Radyo kay Cadiao, iya ginpahayag nga ang mga Antiqueño ang gusto man nga magpahuway sang ila nga galastuhon.
Bangud sini, ipatawag niya ang katapo sang Provincial Development Council, Local Finance Committee kag counterpart sa National Inter-Agency Task Force apang magadepende sa gihapon sa mga head of office kung magpasugot sila bangud sang kadamuon sang trabaho.
Sa tion nga padayunon ini sang Department of Labor and Employment (DOLE) suno kay Cadiao, i-implementar na ini sa Provincial Capitol kag enganyuhon man ang mga private offices sa Antique.
Samtang, bangud sang madamo nga problema nga ginapangatubang ang pungsod, wala ginapahanugutan ang mga caravan kag mga festivities may kaangtanan sa election.
Dugang pa ni Cadiao, tama ka kulang sang P200 nga ayuda nga ginaplano sang gobyerno nga ihatag sa poorest of the poor.
Suno sa iya, kinahanglan sang gobyerno nga magpangita sang iban nga pamaagi agud nga solbaron ang problema.
Nagaplano naman ang Anttique nga mag-apelar nga panubuan ang classification status sa alert level 1 agud mabuksan ang ekonomiya sang probinsya.
