Na-record nga ang probinsya sang Antique ang may pinakamanubo nga kaso sang dengue virus sa bug-os nga Western Visayas.
Sa interview sang Bombo Radyo kay Antique Governor Rhodora Cadiao, iya ginpahayag nga bisan sa kasagsagan sang El Niño sa ila probinsya, indi malikawan nga may yara sila sang kaso sang dengue nga ma-record.
Suno kay Cadiao, may ginpain ang provincial government nga P5 million nga budget agud nga makaprepar sa pagpamahog nga dala sang dengue.
Bangud man sa budget, ang provincial government na ang naga-supply sang mga larvicides kag sprayer sa tanan nga mga barangay sa Antique.
Ginpahayag man sini nga ginapreparahan gid sang lokal nga pamunuan nga butangan sang budget para sa dengue sa tagsa ka tuig.
Gintumod man sang natungdan nga indi naman kinahanglan nga ipaidalum pa sa state of calamity ang probinsya kag indi na kinahanglan nga i-remind ang ila pumuluyo bangud man nga masami na nga daan sila nga nagapatuman sang pagpanglimpyo kada hapon.
Nahibaluan nga sugod Enero tubob Setyeembre 8 subong nga tuig, naglab-ot na sa 1,067 ang kaso sang dengue sa probinsya.
