Imbestigaran sang Antique Provincial Police Office (APPO) ang ginaalegar pagpangkastigo sang mga kapulisan sang Sibalom Municipal Police Station sa apat ka mga manogbulang.
Ini kasunod man sang ginpa-Bombo sang mga manogbulang ang mga pulis.
Sa interview sang Bombo Radyo kay Police Colonel Lea Rose Peña, Provincial Director sang Antique Provincial Police Office, iya ginpahayag nga gilayon sila nga nagpatuman sang imbestigasyon sang nabaton ang report nahanungod sa ginaalegar pagpangkastigo.
Suno kay Peñas, tanan nga involve sa hitabo ang lakip sa pagaimbestigaran.
Nagpasalig man ang natungdan nga kon ano man ang mangin resulta sang imbestigasyon ang magaatubang sang nagakaigo nga reklamo kon mapatud-an nga may kapaltahan.
Ginalantaw man sang talatapan ang tanan nga posible anggulo agud matumod ang mga nagluntad nga iregularidad.
Indi man pag-itolerar sang Antique PPO ang mga kapulisan nga naga-akto nga wala nagakaigo sa ila nga responsibilidad.
Nahibaluan nga ipatawag sang National Police Commission (NAPOLCOM) ang pito ka mga pulis sang Sibalom Municipal Police Station lakip na hepe.
Ginalauman nga sa Myerkules sang aga, Pebrero 12, 2025 magaatubang ang pito ka mga pulis sa nasambit nga talatapan.
