ILOILO – Nadala ang anum ka gobernador sa Western Visayas sa gintumod sang Department of Health nga pabakunahan batok sa COVID-19 sa idalom sang Priority Group A1.5.
Ang mga gobernador sa Rehiyon VI amo sanday Negros Occidental Governor Eugenio Jose Lacson, Iloilo Governor Arthur Defensor Jr., Antique Governor Rhodora Cadiao, Aklan Governor Florencio Miraflores, Guimaras Governor Samuel Gumarin, kag Capiz Governor Esteban Contreras.
Sa interview sang Bombo Radyo kay Dr. Mary Jane Juanico, pinuno sang DOH-Western Visayas infectious disease cluster unit, iya ginpahayag nga sa highly-urbanized cities, nalakip si Bacolod City Mayor Evelio Leonardia.
Sa lebel sang mga banwa kag component cities, 25 ka local chief executives ang natumod sa bilog nga rehiyon lakip ang anum sa probinsya sang Iloilo nga amo sanday:
- Mayor Elvira Alarcon sang Batad
- Mayor Mark Palabrica sang Bingawan
- Mayor Francisco Calvo sang Calinog
- Mayor Oscar Garin sang Guimbal
- Mayor Ma. Lina Holipas sang Leon
- Mayor Rema Somo sang Santa Barbara
Santo sa Advisory Number 26 nga gin-isyu sang National COVID-19 Vaccination Operations Center, ang mga ginpili nga local chief executives ang naghalin sa “critical and high risk areas”.
Yari ang dugang nga guidelines sa gamiton nga mga bakuna:
- Para sa mga local chief executives nga nagaedad 59 anyos panubo, gamiton ang Sinovac COVID-19 vaccine.
- Para sa mga local chief executives nga nagaedad 60 anyos pasaka, gamiton ang AstraZeneca COVID-19 vaccine.
- Para sa mga local chief executives nga may comorbidities, gamiton ang Sinovac COVID-19 vaccine.
Apang sa subong suno kay Juanico, Sinovac vaccine na lang ang available nga vaccine brand sa Rehiyon VI.
