Ginkumpirma sang militar nga lunsay patay ang anum ka mga katapo sang Philippine Air Force (PAF) sang nagtibusok ang ila ginasakyan nga helicopter sa Agusan del Sur samtang magadul-ong kuntani sang bulig sa mga biktima sang Bagyo Tino.
Suno sa Armed Forces of the Philippines’ Eastern Mindanao Command, na-recover na sa search and rescue operations ang lawas sang anum ka mga biktima.
Ginhawiran anay sang awtoridad ang pangalan sang piloto kag crew sang Super Huey helicopter kag gin-una sa pagpahibalo ang ila nga pamilya.
Madasig man nga nag-responde kag nagbantay ang mga soldado halin sa 60th Infantry Battalion sang 1001st Infantry Brigade kag 10th Infantry Division sang Philippine Army sa lugar kun sa diin nagtibusok ang helicopter agud masiguro ang seguridad sa palibot.
Nagpahayag man sang bug-os nga suporta ang Philippine Army sa PAF sa ginapatigayon nga imbestigasyon kaangot sa natabo nga insidente.
Nahibaluan nga ginahikot ang humanitarian operations para sa mga komunidad nga naapektuhan sang Bagyo Tino sang ini nag-crash samtang yara sa Loreto, Agusan del Sur.
Una na nga ginpahayag sang PAF nga nadula ang komunikasyon sa Super Huey helicopter rason nga nag-conduct sang search and rescue operation.#
