BATANGAS – Nagapangibabaw ang espiritu sang pagka-Pilipino apisar sang mga mabudlay nga hangkat tuga sang kalamidad kaangay sang Taal volcanic eruption sa Batangas.
Sa interview sang Bombo Radyo kay Frank Napura, empleyado sang isa ka resort malapit sa Bulkang Taal apang subong nagaserbe bilang isa ka calamity responder sa Mataas na Kahoy, Batangas, iya ginpahayag nga luyag na niya kuntani magpauli bangud sa kabudlay sang sitwasyon apang indi niya mabiyaan ang iya mga kaupod.
Pulo sila nga mga empleyado ang yara nagpabilin sa resort kag nagabalik-balik sa evacuation center sa diin napahamtang ang kapin 10, 000 ka mga tawo nga subong nagakinahanglan pa sang relief operations.
Suno kay Napura, sang tion nga tuman ang ashfall kag ginpataas sa Alert Level 4 ang estado sa lugar, wala niya napunggan nga maghibi bangud naga-panic na ang tanan kag bisan sila nga mga calamity responder ang daw kaangay nga indi na makahibalo sang ila himuon.
Apisar lima ka tuig pa lang nga nagatinir sa lugar, ginpahayag ni Napura nga malapit sa iya tagipusuon ang Batangas.
‘Mixed emotions’ suno sa iya ang nabatyagan bangud nakulbaan siya sa nagakatabo ilabi na bangud may mga nagapahayag nga pataason pa sa Alert Level 5 ang lugar; nahadlok siya bangud ini ang una nga bes nga na-eksperyensyahan niya ang kaangay nga hitabo; kag, nasubuan siya para sa mga biktima.
Kun magtawhay na ang sitwasyon, plano sang natungdan nga magpauli anay sa Miag-ao, Iloilo sa diin nahamtang ang iya pamilya.
Sa subong, ginapanawagan ni Napura sa probinsya sang Iloila nga kun mahimo, buligan paagi sa relief operations ang mga tawo nga yara pa nagapabilin sa evacuation center sa Batangas.
