Nadakpan ang apat ka gina-alegar durugista sa drug buy bust operation nga ginpatigayon sa Barangay Simon Ledesma, Jaro, Iloilo City, Agusto 7.
Ang mga naaresto amo si Alias Ugok, residente sang Simon Ledesma; Alias Bay, tumandok sang Mindanao apang ginapahayag nga lima ka tuig naman nga naga-istar sa balay kun sa diin ginpatigayon ang operasyon; residente sang Barangay Infante, Molo; kag isa pa gid ka residente sang Bo. Obrero, Lapuz.
Sa interview sang Bombo Radyo kay Punong Barangay Amadeo Sultan, iya ginpahayag nga ang nagapanag-iya sang balay kun sa diin nadakpan ang mga suspek amo ang amay ni alias Ugok.
Ginpahayag sini nga may nadakop man nga magtiyo sa amo nga balay sang nagligad bangud man sa kaangtanan sa iligal nga droga.
Suno sa kapitan, pila ka beses na siya nga nagsaway kag nagpaandam apang nagpanindugan ang mga natungdan nga wala naman sila sang ginahimo nga iligal.
Base sa inisyal nga impormasyon, nabaklan ang subject sang isa ka plastic sachet sang suspected shabu gamit ang P8,500 nga buybust money kag nakuha pa gid dugang sa possession ang siyam ka iban pa nga pakete.
Nagapangatubang ang mga suspek sa paglapas sa Republic Act 9165 ukon sa Comprehensive Dangerous Drugs Act of 2002.
