Naluwas sang Israeli military ang apat ka buhi pa nga Israeli hostages nga nangin bihag sang Hamas sa Gaza sa sulod na sang walo ka bulan.
Ginpangalanan sang militar ang mga na-rescue nga amo sanday Noa Argamani, 26, Almog Meir Jan, 22, Andrey Kozlov, 27, kag Shlomi Ziv, 41.
“They are in good medical condition and have been transferred to the ‘Sheba’ Tel-HaShomer Medical Center for further medical examinations,” suno sa Israel Defense Forces (IDF).
Suno sa army, lakip ang apat sa gin-kidnap sang Hamas militans sa Nova music festival sang Oktubre 7 nga amo ang adlaw nga ginkibot sang Hamas militants ang southern Israel kag nagpangpatay sang mga residente.
Suno kay Israeli army spokesman Rear Admiral Daniel Hagari, isa ka complex daytime operation ang ila ginhimo sa duha ka separado nga buildings sa Gaza agud lamang maluwas ang mga bihag.
Isa man ka soldado ang nasamaran bangud sa operasyon, apang klaro suno sa militar ang ila mensahe nga determinado sila nga ubuson-hilway ang mga bihag nga ginauyatan pa sang militante nga grupo.
Samtang, gin-report naman sang government media office sa Gaza nga 210 ka tawo ang napatay kag masobra 400 ang nasamaran bangud sa operasyon sang Israel agud maluwas ang mga bihag. Ginpahayag nga ini nga casualties ang gindala sa duha ka mga ospital sa Gaza nga amo ang Al-Awda Hospital sa Nuseirat kag Al-Aqsa Martyrs Hospital sa Deir Al-Balah.
Ini nga operasyon ang ginpatigayon sa ikawalo na nga bulan sang gyera sang Israel batok sa Palestinian Hamas militants sa Gaza.
Isa ini ka pagtimalos sa pag-atake sang Hamas sang Oktubre 7, 2023 kun sa diin 1,194 ang napatay kag gindala pa sang militante ang 251 hostages kun sa diin ang yara pa sa Gaza kag 41 ang kumpirmado na nga nagkalamatay. Sa pagtimalos naman sang Israel paagi sa ground offensive sa Gaza, yara na sa 36,801 ka Palestinians ang nagkalamatay.#
