Ginkumpirma sang Armed Forces of the Philippines (AFP) nga may na-monitor ini nga apat ka People’s Liberation Army (PLA) Navy vessels nga naglabay sa teritoryo nga sulod sa 12 nautical miles halin sa Palawan subong nga semana.
Ini amo ang destroyer nga Luyang III (DDG-168), ang frigate nga Jiangkai II (FFG-570), ang destroyer nga Renhai (CG-105), kag ang replenishment oiler nga Fuchi (AOR-907).
Tanan ini suno sa militar ang padulong sa nabagatnan-nakatundan sang Balabac Strait sa tunga sang Palawan kag Borneo.
Bilang kabahin sang standard operating procedure, ginradyuhan ang Chinese Navy vessels kag nagbalos man ang amo nga mga barko.
Ini nga area suno kay Trinidad ang masami nga gina-agyan sang international vessels.
Matandaan nga sa temprano nga bahin subong nga bulan, ginpahayag sang Philippine Navy nga malapit sa 150 Chinese vessels ang nakit-an sa nagkalain-lain nga maritime features sa West Philippine Sea.
Halin sang Hunyo 4-10, nakit-an sang Navy ang 146 Chinese vessels sa walo ka maritime features: 108 Chinese Maritime Militia vessels, 22 ang People’s Liberation Army Navy vessels, kag 16 China Coast Guard vessels.
