Napasakaan na sang kaso sa paglapas sang Comprehensive Dangerous Drugs Act of 2002 ang apat ka indibidwal nga nakuhaan sang masobra P14-milyon nga balor sang shabu sa drug buy-bust operation sa Barangay Maya, Balasan, Iloilo.
Sa interview sang Bombo Radyo kay PMaj Dadje De Lima, hepe sang Provincial Drug Enforcement Unit, iya ginpahayag nga magluwas sa sini nga kaso, ginpasakaan man ang mga ini sang kaso bangud sa iligal nga pagpanag-iya sang armas nga wala sang nagakaigo nga dokumento.
Ini ang isa ka paglapas sa Republic Act No. 10591 ukon Comprehensive Firearms and Ammunition Regulation Act.
Suno sa imbestigasyon, na-identify na ang ginhalinan sang suplay nga ginapatihan halin sa Metro Manila kag may ara man sang source diri sa syudad sang Iloilo kun kulang ang suplay.
Suno pa sa kapulisan nga ang pagpasulod sang illegal nga droga ginapaagi sa barko kag naga “innovate” ang grupo agud malikawan ang pag-detect sang mga otoridad.
Padayon naman ang imbestigasyon sang kapulisan agud mahibaluan ang iban pa nga persona nga posible may kaangtanan sa ilegal nga operasyon.
