Natalana nga ipaidalom sa psychological evaluation ang apat ka kabataan ni Lorry Mae Baylon, ang 27 anyos nga nagabusong nga babaye nga napatay matapos ginaalegar ginkastigo sang iya kasilingan nga retired nga pulis kag asawa sini nga maestra sa Zone 5, Boulevard, Molo, Iloilo City.
Sa interview sang Bombo Radyo kay Teresa Gelogo, focal person sang Iloilo City Social Welfare and Development Office (CSWDO), iya ginpahayag nga ginsaylo na ang mag-ululutod nga 12, walo, lima ka tuig nga lunsay babaye kag tatlo ka tuig nga agot nga lalaki sa kustodiya sang ila lola nga amo ang tiya sang ila amay agud indi maglala ang ila trauma nga ginaagyan kasunod sang kamatayon sang ila iloy.
Suno kay Gelogo, sa tion nga mabatian lang sang mag-utod ang pangalan sang ila nga iloy, indi mapunggan kag nagahilibion ang mga ini.
Pahayag sang natungdan, pinaka-apektado sa apat ka mag-utod ang walo ka-tuig nga babaye bangud ini ang masami nagaupod sa paglibod sang lamayo sa iya nga iloy.
Natalana naman nga magpauli sa Iloilo City ang ikaduha nga bana ni Baylon.
Sa subong, padayon sa paghatag sang suporta kag pagmonitor ang CSWDO sa apat ka kabataan ni Baylon.
Nahibaluan nga Biyernes, Abril 9, natalana nga magaabot ang bangkay ni Baylon sa ila nga balay.
