𝗜𝗟𝗢𝗜𝗟𝗢 𝗖𝗜𝗧𝗬 — Pagabuksan na sa Hunyo 20, 2024 ang apat ka mga bag-o nga police stations sa Iloilo City.
Sa interview sang Bombo Radyo kay Police Colonel Joeresty Coronica, Director sang Iloilo City Police Office, iya ginpahayag nga tung-on ang Iloilo City Police Station 1 sa duha para sa Police Station 7 nga ipahamtang sa ICARE Center sa Brgy. Tanza-Esperanza, Iloilo City Proper
Suno kay Coronica, ma-cover sang Police Station 1 ang 51 ka mga barangay sa syudad, samtang ang Police Station 7 naman ang ma-cover ang 24 ka mga barangay.
Dugang sang natungdan nga ang Police Station 3 ang masakop ang 29 ka barangay samtang ang olice Station 9 naman ang may 13 ka mga barangay nga masakopan sa Distrito sang Jaro.
Ginpahayag man ni Coronica nga ang Police Station 2 ang ma-cover ang Distrito sang Lapaz kag Lapuz, samtang ang Police Station 8 ang may pito ka mga barangay nga ma-cover sa porsyon sa Lapuz District.
Masakopan naman sang Mandurriao Police Station ang 11 ka mga barangay, samtang ang Police Station 6 ang maka-cover sang 13 ka mga barangay.
Ginpasigurado man ni Coronica nga preparado ang mga heads nga i-augment sa tagsa ka istasyon agud pangunahan ang ila nasakopan nga kapulisan.
Gin-athag man sang natungdan nga gindugangan ang mga istasyon agud mapalapit sa komunidad kag bangud man sa nagasaka nga populasyon sang Iloilo City.
Gina-ekspektar naman sang Iloilo City Police Office nga mangin madamo ang kapulisan nga magabantay sang syudad agud mapabilin ang kalinong kag katawhay.
