ILOILO CITY- Apat ka mga bag-o nga police stations ang plano nga tukuron sa Iloilo City.
Isa ang ipahamtang sa Tanza, Esperanza kag tawgon nga Police Station 7; isa ang ibutang sa Mandurriao kag tawgon nga Police Station 8; isa sa Jaro nga tawgon nga Police Station 9; kag isa sa Bo. Obrero, Lapuz kag tawgon nga Police Station 10.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga tinguhaan gid nga mauna mabuksan ang Police Stations 7 kag 8 nga yara sa City Proper kag Mandurriao.
Suno kay Sangrines, ang mga nangin basehan sa pagdugang sang police stations sa mga nasambit nga lugar amo nga crime prone area ang mga ini kag malapad gani nagakinahanglan ini sang pagbantay sang otoridad.
Kung madumdoman sang lunes nga adlaw may downloading of personnel nga ginhiwat ang Police Regional Office 6 kag ang pinakadako sini nga numero sang mga personnel amo ang ginhatag sa Iloilo City Police Office nga may 132 nga amo ang i-assign sa apat ka bag- o nga mga police stations.
Dako man ang pagpasalamat ni Sangrines sa suporta nga ginahatag sang Police Regional Office 6 sa pagpamuno ni Police Brigadier General Jack Wanky agud mahatagan katumanan ini nga handom sang Iloilo City Police Office.
