ILOILO – Kabalaslan ang ginalantaw sang apat ka grupo nagikan sa banwa sang Anilao kon ngaa sila ang nagpadulong gid sa syudad sang Iloilo kag nagpasakop sa tuigan nga nationwide bloodletting activity.
Ang mga grupo amo ang Anilao Farmers’ Association, Guardians Brotherhood Anilao, Lagamon Clan, kag Scouts Royale Brotherhood nga naghalin pa sa nagkalain-lain kag malayo nga mga barangay sa nasambit nga banwa.
Sa interview sang Bombo Radyo kay Allan Lagamon, isa sa mga nagbulig agud matipon ang mga grupo, iya ginpahayag nga ila na napamatud-an sang nagligad pa nga kon sila ang nagakinahanglan sang dugo, gilayon man nga nagabulig kag sila ang ‘wala gina-indi-an’ sang pamunuan sang Bombo Radyo kag sang Philippine Red Cross (PRC).
Magluwas diri, nakaagi naman sila donar sang nagligad nga tuig, amo nga ginakabig na nila ini nga kawsa.
Ini ang rason suno kay Lagamon nga apisar sang malain nga tiyempo, nagtipon ang ila grupo agud magpakigbahin liwat sa subong nga tuig.
Aminado man si Lagamon nga mabudlay ang pag-coordinate agud matipon ang tanan nga grupo, kag kinahanglan pa nila nga magsakay sa habal-habal agud makadtuan ang suludlon nga mga barangay.
Apisar sini, tuman man ang pagpasalamat ni Lagamon kag sang iya grupo sa mga opisyal kag kaabyanan nga amo ang naghatag sa ila sang fund kag pagkaon agud mangin matalunsay ang ila akto sa blood donation sa Dugong Bombo 2019.
Ang Dugong Bombo 2019 ang ginhiwat sa Iloilo Science and Technology University (ISAT-U).
