Apat ka mga hagna ang hatagan-prayoridad sang Senado sa pagbalik sang session sa Martes, Enero 14.
Suno kay Senate Majority Leader Francis Tolentino, lakip diri ang hagna nga nagaduso sa pag-postpone sang barangay elections kag pagtutok sa modernisasyon sang Phivolcs ukon Philippine Institute of Volcanology and Seismology.
Hatagan man sang igtalupangod ang amendments sa Baguio City Charter kag ang pension adjustments sa Department of Foreign Affairs (DFA).
Apang suno sa senador, nagapanguna gid sa ila prayoridad amo ang proposal nga i-reset ang barangay elections.
Sa idalom sang Senate Bill No. (SBN) 2816, ginaproponer nga ipaiway anay ang 2025 Barangay and Sangguniang Kabataan Elections (BSKE) kag ipatigayon na lang sa May 2029. I-extend man ang termino sang mga barangay officials tubtub sa anum ka tuig.
Gin-sponsor ini sa Senate plenary ni Electoral Reforms Committee Chairperson Imee Marcos sang Nobyembre 2024.
Tuyo sini suno sa senadora nga masigurado nga indi magdungan ang barangay elections sa national and local elections, para nga mas epektibo ang governance cycle kag mahatagan ang Commission on Elections sang tyempo para nga malinong kag matalunsay ang leksyon.
Nahibaluan nga sa Lunes gid kuntani naka-schedule ang pagbukas liwat sang plenary sessions apang ginkanselar sang Senado bangud sa “National Rally of Peace” sang Iglesia ni Cristo (INC) bilang pagpamatok sa impeachment complaints batok kay VP Sara Duterte.
