Arestado sa ginpatigayon nga drug buy bust operation sang Regional Police Drug Enforcement Unit (RPDEU) 6 ang apat ka ginaalegar nga durugista sa Fatima Subdivision, Barangay Sta Cruz, Arevalo, Iloilo City.
Ang main subject amo si alias Isboy, 49, residente sang amo nga barangay.
Arestado man ang duha ka kaangay niya nga high-value individuals nga sanday Alyas Reniel, 26, kag Alyas Jerson, 27, lunsay residente sang Barangay Sooc sa amo nga distrito. Nadakpan man si Alyas Sherwin, 45-anyos, street level individual, kag residente sang Zone 13, Brgy. Calaparan sa amo gihapon nga district.
Sa interview sang Bombo Radyo kay Police Captain Glenn Soliman, officer-in-charge sang RPDEU 6, iya ginpahayag nga naglab-ot sa malapit isa ka bulan ang monitoring sa mga subject.
May ginpang-buyagyag naman ang mga ini nga pangalan sang ila ginakuhaan sang illegal nga droga apang gina-verify pa ini sang mga kapulisan.
Base naman sa imbestigasyon sang kapulisan nakaagi na preso si Alyas Isboy bangud man sa involvement sa iligal nga droga.
Natigayon makuha sa ila posisyon ang 225 grams sang suspected shabu nga may standard drug price nga P1,530,000.
Yara na sila sa kustodiya sang Iloilo City Police Station 6 kag possible nga magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
(Article: Bombo Phauline Pillora)
