Napuhag ang mga pumuluyo sang Bolilao, Mandurriao, Iloilo City matapos ang rambol nga natabo pasado alas-singko kaina sang aga.
Ini ginkaulamiran sang duwa ka grupo nga nagrambolanay kag naglinamposanay pa sang botilya.
Sa interview sang Bombo Radyo kay Police Captain Val Cambel, hepe sang Police Station 10, iya ginpahayag nga base sa ila imbestigasyon may ara sang indi pag-intindihanay ang duwa ka grupo kag yara ang mga ini sa impluwensiya sang makahulubog nga ilimnon.
Suno pa sa iya, gina-alegar nga nasalapay sang isa ka grupo ang pihak nga side rason nga nagsugod ang ila paglainanay sang buot.
Apat ka indibidwal ang napasakaan sang kaso nga alarm and scandal, apang may ara man sang wala nadakpan bangud sa madasig nga pagpalagyo sang iban nga nadala.
Tag-duha ka indibidwal sa tagsa ka grupo ang ginpasakaan sang kaso.
Dugang pa ni Cambel, gina-imbestigaran pa ang iban nga detalye sang insidente.
Samtang suno naman sa isa ka pumuluyo nga si alyas Jun nga nakasaksi mismo sang rambol, updanay nga nag-inom ang mga nagrambolanay apang separado ang ila mga lamesa kag indi man ang mga ini personal nga magkilalahay.
Iya ginpahayag nga nag-umpisa ang ila pag-inaway matapos madula ang cellphone sang isa ka upod sang grupo kag ginpasibangdan nila nga gin-kuha sang pihak nga grupo.
Bangud sini, ginrikisa ang mga bulsa sang pihak nga grupo agud pangitaon ang nasambit nga cellphone.
Gilayon naman nga naimpito ang pihak nga grupo nga suno sa ila indi man ang mga ini pulis apang ngaa nga ginrikisahan sila sang nasambit nga grupo.
Ginkumpirma sang Iloilo City Police Office ang pagpasaka sang reklamo nga Alarm and Scandal sa Iloilo City Prosecutor’s Office batok sa apat ka mga indibidwal nga na-involve sa rambol sa Bolilao, Mandurriao, Iloilo City.
Suno kay Police Major Shella Mae Sangrines, spokesperson sang Iloilo City Police Office, natigayon nga pasakaan ang apat ka indibidwal subong nga adlaw, Enero 31.
Suno sa imbestigasyon, ginhingadlan ang pila ka mga nadala nga sanday alyas “Jan,” 23 anyos, isa ka food handler kag pumuluyo sang Brgy. Poblacion, San Dionisio; “Philip,” 26 anyos, isa ka waiter kag pumuluyo sang Brgy. Calumpang, Molo; dugang pa diri nadala an si“JP,” 21 anyos, isa ka waiter kag pumuluyo sang Brgy. Banban, Lambunao, Iloilo; kag “Rey,” 18 anyos, estudyante, pumuluyo sang Brgy. Bolilao, Mandurriao, Iloilo City.
Sila ang nadakpan sang mga personnel sang Iloilo City Police Station 5 (ICPS5) nga nagpatigayon sang mobile patrol kag roving operations sang amo nga tion.
Ginpahayag man sang ICPO ang ila panawagan sa publiko nga mangin responsable kag ila padayon nga pagapabaskugon pa gid ang presensya kag patrol sang kapulisan agud malikawan ang kaangay nga mga insidente sa syudad sang Iloilo.
