Patay ang apat ka mga indibidwal kag 25 naman ang nasamaran sa lapnagon nga pag-atake sang Russia sa Ukraine gamit ang nuclear-capable missile
Suno sa Ukrainian Air Force, nag-gamit ang Russia sang 242 ka drones kag 36 ka missile.
Naguba kag napunggan sang Ukraine ang kadam-an sa mga drones kag missile apang naka-abot sa gihapon sa 19 ka lokasyon ang iban sini nga pagpang-atake.
Tuman naman ang naexperiensyahan sang Kyiv, kun sa diin naguba ang 40 ka mga pasilidad sini upod ang 20 ka mga residential buildings kun sa diin may apat ka mga napatay kag 25 ang mga nasamaran.
Ginkumpirma sang Russia nga gingamit sang mga ini ang Oreshnik intermediate-range missile system nga sarang magdala sang madamo nga warheads sa hypersonic speed.
Suno sa Russia, sabat ini sa drone attack sa state residence ni President Vladimir Putin nga ginpangiwala sang Ukraine.
Gintawag naman sang Ukrainian Foreign Minister ang paggamit sang missile bilang pamahog sa seguridad sang Europa.
