Ginalauman nga madugangan pa ang siyam ka mga atleta nga Pilipino nga ipadala sang Pilipinas sa Paris Olympics 2024.
Ini paagi sa apat ka mga boksidor nga ipadala sang Association of Boxing Alliances of the Philippines (ABAP) sa katapusan nga Boxing Olympic Qualifying Tournament sa Bangkok, Thailand sa Mayo 23 tubtub sa Hunyo 3.
Lakip diri ang Tokyo Olympic silver medalist nga si Carlo Paalam kag si Rogen Ladon nga nagtiglawas man anay sa Pilipinas sa 2016 Rio De Janeiro Games.
Pareho sanday Paalam kag Ladon nga nag-compete sa una nga qualifying tournament sa Thailand apang nahulog si Ladon sa last 16 sang men’s 51kg class, samtang wala naman napatapos ni Paalam ang iya hampang kag nag-atras na sa last 16 sang men’s 57kg bangud sa ginsuprer nga injury.
Magluwas sa duha ka Olympians, balantayan man sa Thailand sanday Hergie Bacyadan nga proud member sang LGBTQ+ community, tumandok sang Kalinga, kag labing-una nga Filipino Vovinam World Champion; kag si Criztian Pitt Laurente, ang “Golden Boy” nga isa man ka Filipino prospect kag professional boxer halin sa General Santos.
Antes ang tournament, magasabak ang mga boksidor sa US Olympic Training Center sa Denver, Colorado umpisa subong nga Abril 9, kag magapasakop sa isa ka semana nga tournament sa amo man nga American state halin sa Abril 14-21.
Kun matapos na, magabalik sila sa Pilipinas kag maga-preparar na sa byahe sa Bangkok sa Mayo 9 para sa duha ka semana sa training camp antes ang pagtapak sa Olympic qualifier.#
