Ginkumpirma sang Department of Foreign Affairs (DFA) nga may apat ka mga Pinoy nga wala pa nakit-an kasunod sang 7.7 magnitude nga linog nga nagtay-og sa Myanmar sang Byernes.
Suno kay Foreign Affairs Undersecretary Eduardo de Vega, lunsay professional ang apat nga overseas Filipino workers (OFWs) kag naga-trabaho bilang mga teachers kag office staff. Duha sa ila ang mag-asawa kag naga-tinir sa building nga nag-collapse sang natabo ang linog.
Naghingyo si De Vega nga ipangamuyo ang mga Pinoy nga makit-an na nga buhi.
Base naman sa advisory sang Philippine Embassy in Myanmar (Yangon), nagapreparar ini sa pag-deploy sang team sa Mandalay para sa “on-the-ground assessment” kag “direct welfare checks” sa mga Pilipino.
Nahibaluan nga ang Mandalay amo ang ikaduha sa pinakadaku nga syudad sa Myanmar nga may masobra 1.7-million nga mga residente kag kaiping lang sa nangin epicenter sang linog nga amo ang central Sagaing region.
Sa latest data halin sa ruling military junta sang Myanmar, nagsaka na sa 1,700 ka mga tawo ang patay, 2,376 ang nasamaran, kag 3,408 ang missing sa Myanmar kasunod sang linog.
Kun basehan ang United States Geological Survey, mahimo maglab-ot sa 10,000 ang death toll.
Sa Thailand naman, 18 na ang kumpirmado nga patay as of press time matapos nga nag-collapse man ang isa ka high-rise building sa Bangkok kag may yara man sang natumba nga crane. Wala naman sang mga Pilipino nga nahalitan kag napatay sa Thailand base sa inisyal nga mga impormasyon nga ginapahibalo sang embahada sang Pilipinas.
