MIAGAO, ILOILO – Lunsay asymptomatic kag naka-facility quarantine ang apat ka mga COVID-19 positive sa Miagao, Iloilo.
Ang apat ka pasyente ang kabahin lamang sang 14 nga na record sa probinsya sang Iloilo, kahapon, Setyembre 2, kun sa diin naglab-ot na sa 900 ang total COVID-19 cases kag 20 naman ang ginbawi-an sang kabuhi.
Sa interview sang Bombo Radyo kay Mayor Macario Napulan sang Miagao, Iloilo, iya ginpahayag nga ang apat ka mga nagdugang nga pasyente amo ang mga masunod:
-23 anyos nga lalaki
-47 anyos nga babayi
-31 anyos nga babayi kag
-41 anyos nga babayi
Ang duha ka mag-utod nga babayi ang identified close contact sang ila utod nga pulis nga nagatrabaho sa syudad sang Iloilo kag una nga nagpositibo sa COVID-19.
Ang isa ka COVID-19 positive ang nagatrabaho sa banwa sang Pavia kag antes pa man nagguwa ang kumpirmasyon, nakapauli pa ini sa ila balay samtang ang isa naman ka COVID-19 positive ang fish vendor sa banwa sang Miagao kag local transmission gikan sa Iloilo Fish Port Complex.
May kaangtanan sa pagpositibo sang fish vendor, mas gin-istriktuhan ang pagpasulod sa merkado sang Miagao kag required man nga magpaidalom sa COVID-19 test ang mga nagabaligya sa fish section.
