Patay ang apat ka piloto sang Philippine Air Force (PAF) matapos nagbungguanay ang duha ka aircraft kadungan sang flight training sa Batangas.
Ginkumpirma ini sang Air Force subong nga adlaw, Oktubre 24.
Temporaryo nga grounded ang ila tanan nga SF-260 aircraft agud imbestigaran ang ginhalinan sang disgrasya.
Bangud sa amo nga insidente, nagtibusok ang duha ka aircraft malapit sa Fernando Air Base sa Lipa City mga alas 3:51 sa hapon kahapon.
Wala pa ginsapubliko sang Air Force ang pangalan sang apat ka mga piloto kag wala pa gindetalye kun ano ang nagtuga sang trahedya.
Nagakoordinar naman ang PAF sa mga pamilya sang biktima agud makahatag sang nagakaigu nga bulig apang ginhingyo sang mga ini nga respetuhon ang ila privacy.
Nahibaluan nga ang SF-260 amo ang light aircraft nga ginagamit sang Air Force para sa pilot training.
Kahapon, una na nga nagpagwa sang report ang PAF nahanungod sa insidente nga naga-involve sang duha ka SF-260 sa Fernando Air Base, apang sang amo nga tion, wala ginpahayag kun may yara sang mga napatay.
Gilayon man nga ginpahibalo ang mga otoridad para sa emergency response measures para siguruhon ang lugar kag magpatigayon sang initial assessment.
