Arestado ang isa ka police major kag tatlo ka police sergeant bangud sa gin-alegar nga involvement sa pag-kidnap sa apat ka foreign nationals sa Pasay City.
Mismo si Interior and Local Government Secretary Benhur Abalos ang nagpresentar sa mga suspek nga amo sanday Police Major Christel Carlo Villanueva, Police Senior Master Sergeant Angelito David, Police Master Sergeant Ricky Tabora, kag Police Staff Sergeant Ralph Tumanguil. Naka-assign ang mga ini sa Makati City, Pasay City, kag sa National Capital Region Police Office.
Suno kay Abalos, sang Hunyo 2, sakay ang apat ka foreign nationals sa isa ka salakyan sang ginpapundo sila sang mga personnel sang Philippine National Police nga nagasakay sa motorsiklo sa Taft Avenue. Sa ila likod amo ang isa ka puti nga van.
Ginpapanaog ang apat ka foreigners apang nakapalagyo ang duha kag nakapangayo sang tabang sa otoridad.
Ang duha ka iban pa ang nagsuprer sang mga samad apang ginhilway man matapos nahatag sa kidnappers ang P2.5-million nga ransom.
Ini nga mga suspek ang nagapangatubang sang panumbungon nga kidnapping with ransom, robbery, kag carnapping nga ginpabakod pa sang mga ebidensya nga nakuha sang otoridad nga amo ang CCTV footage, phones, PNP-issued firearms kag motorcycles.
Magluwas diri, may dugang pa nga mga suspek lakip na ang isa ka sibilyan nga mastermind nga at large pa gihapon suno sa kapulisan.
Ginpasalig naman ni Secretary Abalos nga indi pag-i-tolerar sang PNP ini nga insidente nga makabig nga serious breach of public trust kag sa core values sang police force.
