Ginalauman nga mapadali ang relief operations sa mga area nga labi nga apektado sang Bagyo Kristine bangud sa air assets nga ipadala sang iban nga mga pungsod sa Pilipinas.
Santo sa kumpirmasyon ni Office of Civil Defense (OCD) administrator Ariel Nepomuceno, ang naghatag sang commitment nga magpadala sang ila bulig sa Pilipinas paagi sa air assets amo ang Brunei, Malaysia, Singapore kag Indonesia.
Ini nga C-130 aircraft kag helicopters ang makabulig sa paghakot sang relief goods nga mga komunidad nga indi pa halos maabtan sang bulig bangud guba ang mga karsada kag ginagutom na ang mga tawo.
Sa separado nga statement sang Singaporean Ministry of Defense, ginkumpirma sini nga magapadala ang Singaporean Armed Forces (SAF) sang isa ka Republic of Singapore Air Force (RSAF) C-130 transport aircraft para makabulig sa humanitarian efforts.
Magluwas diri suno sa OCD, may dugang pa gid nga bulig nga ginpasalig ang iban nga mga pungsod para sa relief efforts apang wala pa sini ginhingadlan kun ano ini nga mga nasyon.
Nahibaluan nga halin sang naglaslas si Kristine partikular sa Bicol, naghulag ang mobility assets sa pag-deliver sang relief supplies lakip ang halin sa Visayas kag Mindanao nga gindala sa Matnog Port sa Sorsogon paagi sa Navy vessels.
May yara man sang 200 nga police officers halin sa Eastern Visayas nga kabahin sang humanitarian contingent kag nag-abot sa Bicol kahapon suno sa Philippine National Police (PNP).
Magluwas diri, may yara pa dugang nga batch sang mga pulis nga halin sa Calabarzon nga magabulig man sa Bicol.
May duha man ka PNP helicopters nga gin-deploy sa Bicol agud ma-assess ang sitwasyon kag madala ang relief goods halin sa Camp Crame.
Sa pihak nga bahin, ginpadala man sang Philippine Coast Guard (PCG) ang 44-meter patrol ship BRP Cabra para makarga ang relief goods pakadto sa Bicol region.
Kasunod naman sang mandu ni President Marcos, ang Philippine Air Force (PAF) ang naggamit man sang Bell 412 presidential helicopter agud madala ang relief goods sa Albay kag sa Bicol Region. Sa amo nga misyon, nag-upod man pati ang PAF Black Hawk kag Huey helicopters para sa disaster relief operations.
