ILOILO CITY – Apat ka mga salakyan ang nagkarambola matapos nadulaan sang preno ang isa ka stake truck nga may karga nga mais sa Brgy. Buhang, Jaro, Iloilo City.
Mismo ang driver nga ginkilala kay Eduardo Sapasap, 52 anyos sang Tapaz, Capiz ang nag-ako nga nadulaan sang preno ang iya ginamaneho nga stake truck nga nagdalasa sa isa ka truck nga may karga nga kabilya, pribado nga salakyan, depampasahero nga jeep kag motorsiklo.
Sa interview sang Bombo Radyo kay SPO3 Richie Dequito, imbestigador sang Jaro Police Station, iya ginpahayag nga halin sa circumferential road ang truck kag nagapadulong sa coastal road apang nadulaan sang preno rason nga nadalasa ang truck kag ang pribado nga salakyan.
Gintinguhaan pa sang driver nga ilikaw ang truck apang nalab-ot pa gid ang de pampasahero nga jeep kag ang motorsiklo.
Nagsuhot pa sa idalom sang stake truck ang motorsiklo apang mapalaron nga nalaukso ang driver.
Minor nga pilas lang ang naangkon sang mga pasahero sang Jeep kag hilway man ang driver sang isa ka truck kag pribado nga salakyan.
Si Sapasap ang magapangatubang sang kaso nga reckless imprudence resulting to damage to properties and physical injuries.
