Pila na ang imo edad sang natun-an mo nga magsulat sang tula, essay, ukon bisan gani mag-master sa pag-construct sang maayo nga paragraph?
Dalayawon subong ang isa ka apat ka tuig nga bata nga lalaki sa Saudi Arabia nga amo ang ginkilala sang Guinness World Records bilang pinaka-bata nga author sa bilog nga kalibutan matapos naka-baligya na sang masobra isa ka libo ka kopya sang iya libro nga “The Elephant Saeed and the Bear”.
Ang children’s book nga ini ang ginsulat ni Saeed Rashed AlMheiri. Istorya ini sang kindness kag wala ginlauman nga pag-abyanay sa tunga sang isa ka elepante kag isa ka polar bear.
Suno sa young author, gusto-gusto gid niya nga ginabasa niya ang iya nga istorya sa iya ginikanan kag mga abyan sa eskwelahan.
Magluwas sa pagsulat kag pagbasa, isa pa gid sa hilig ni Saeed amo ang mathematics bangud luyag man niya nga mag-solve sang math problems kaupod sa iya nga iloy.
Indi man ini bag-o sa pamilya ni Saeed bangud ang nag-inspire sa iya nga makahimo sini nga rekord amo mismo ang iya utod nga babayi nga amo ang former record holder para sa “youngest person to publish a bilingual book (female)” kag “youngest person to publish a bilingual book series (female)” sang siya naga-edad pa lamang sang walo ka tuig.
Gin-share man ni Saeed nga dungan sila sang iya magulang nga nagabasa, nagasulat, kag naga-enjoy sa ila drawing kag iban pa nga activities bilang mga bata.
Sa bata nga edad, may ginlunsar man ang utod nga babayi nga “Books from Children to Children” initiative nga amo ang naga-engganyo sa mga bata edad apat tubtub 10 ka tuig nga mag-sulat, mag-illustrate, kag maghimo sang libro para sa iban nga mga kabataan.
Masako na subong ang mag-utod para sa ila masunod nga mga libro kag handa man nga mang-guba sang masunod nga mga rekord sa kalibutan. ##
