ILOILO CITY – Patay ang apat ka mga persona matapos nga nabunggu-an sang pick-up ang tricycle sa Barangay Oyungan, Miagao, Iloilo.
Ang mga napatay amo sanday Bien Estorpe, 49, driver sang tricycle kag asawa nga si Arlyn, 50, kag bata nila nga si Arbie, 10, lunsay mga residente sang Brgy. Igdulaca, Miagao, kag Helen Olaguer, 45, sang Brgy. Igcatambor, Miagao nga nakasakay man sa tricycle.
Pilason naman ang duha ka mga menor de edad nga bata ni Olaguer kag padayon nga ginabulong sa ospital.
Ang driver naman sang pick-up amo si Noel Tactica, 25, sang Brgy. 5, San Joaquin, Iloilo.
Sa interview sang Bombo Radyo kay Police Captain Marvin Buenavsita, anum ang sakay sa tricycle sang natabo ang aksidente.
Sa imbestigasyon sang kapulisan, pareho nga padulong sa direksyon sang banwa sang San Joaquin ang pick-up kag tricycle.
Pag-abot sa lugar, nadulaan sang control ang driver sang pick-up rason nga nabungg-an niya ang ginasundan nga tricyle.
Sa subong, preso na sa Miga-ao PNP ang driver sang pick-up kag padayon ang imbestigasyon sang kapulisan sa natabo nga aksidente.
