Isa na lang sa lima ka mga lider sang House Quad Committee (Quad Comm) ang nabilin samtang ginahandaan ang pagsulod sang 20th Congress.
Ang “last man standing” sa main panel amo si Antipolo City 2nd district Rep. Romeo Acop nga amo ang nagpungko nga overall vice chairman.
Isa siya ka anay police brigadier general nga nagdaog sa 2nd district race sa amo nga syudad, apang wala pa sang kasiguruhan kun ano ang mangin papel sini sa masunod nga Congress kun yara pa ang mega-panel.
Tatlo naman sa mga myembro sang Quad Comm ang naka-“graduate” na matapos nakaserbe na sang tatlo ka sunod-sunod nga termino.
Ini amo sanday overall chairman Surigao del Norte 2nd district Rep. Robert Ace Barbers, kag co-chairmen sini nga sanday Santa Rosa City lone district Rep. Dan Fernandez kag Abang Lingkod Party-list Rep. Joseph Stephen “Caraps” Paduano.
Sila nga tatlo ang nagapamuno sa Committees on Dangerous Drugs, on Public Order and Safety, kag on Public Accounts sa 19th Congress.
Ang isa pa ka co-chairman nga si Manila 6th district Rep. Bienvenido “Benny” Abante nga chair sang Committee on Human Rights ang indi na makit-an sa 20th congress matapos nalutos sa eleksyon subong nga 2025.
Kilala ang quad comm bangud sa 13 ka marathon hearings nga ginpatigayon nga naka-sentro sa mga isyu lakip na sa drug war, Philippine Offshore Gaming Operators (POGO) kag money laundering.
Nangin matunog man ang mga drama sa sini nga hearings, may dalagku nga mga rebelasyon, may mga gindagdagan sang contempt order, kag ginsundan man bangud sa kontrobersyal nga resource persons lakip na sanday Alice Guo, Cassy Ong, Harry Roque, Kerwin Espinosa, former Iloilo City Mayor Jed Mabilog, kag former president Rodrigo Duterte.#
