Iloilo City – Nakasentro sa karon ang Philippine Army sa operasyon agud mapapas ang guerilla fronts sa Western Visayas.
Ini matapos natukiban nga sa siyam ka mga guerilla fronts sa Visayas, apat diri ang naghina ang pwersa kag naka-base ang mga ini sa Region 6.
Sa interview sang Bombo Radyo kay Major General Benedict Arevalo, Commander sang Armed Forces of the Philippines-Visayas kag Commander sang Third Infantry Division sang Philippine Army, iya ginpahayag nga ginapadasig na nila ang operasyon agud matapna ang mga rebelde.
Suno kay Arevalo, nangin dako nga kahigayunan ang madinalag-on nga operasyon sang militar sa banwa sang Miag-ao kaangay sang checkpoints kag mga opensiba batok sa mga terorista nga grupo.
Ginapahayag nga may yara sang 200-250 ka mga miyembro ang kada guerilla front sa Western Visayas.
