Gintay-og sang sunod-sunod nga linog ang Anini-y, Antique nga nabatyagan man pati sa Iloilo City kag sa pila ka mga banwa sa probinsya.
Sandig sa record sang Philippine Institute of Volcanology and Seismology (PHIVOLCS), 14 ka linog ang may epicenter nga Anini-y umpisa 9:06 kagab-i tubtub 4:30 subong nga kaagahon.
May kabaskugon ini nga magnitude 2.0 tubtub sa magnitude 4.9.
Sa sini nga mga pagtay-og, apat ka beses nga lapaw sa magnitude 4 ang na-rekord nga amo ang masunod:
*magnitude 4.2 – 9:06 p.m.
- magnitude 4.2- 11:22 p.m.
- magnitude 4.9 – 11:34 p.m.
- magnitude 4.3 – 12:01 p.m.
Sa magnitude 4.9 kagab-i, mabaskog nga pagtay-og ang nabatyagan diri sa Iloilo City. Una ini nga na-rekord nga magnitude 4.7 antes gin-adjust kag ginpataas sang Phivolcs.
Yari ang reported intensities:
Intensity III – City of Sipalay, Negros Occidental
Intensity II – City of Bago, Negros Occidental; Anini-y and Culasi, Antique; Buenavista and Jordan, Guimaras; City of Iloilo
Intensity I – Sebaste and Valderrama, Antique; Nueva Valencia, Guimaras; Tapaz, Capiz; City of Passi, Iloilo
Lunsay tectonic in origin ang linog, kag base sa tatlo ka mga separado nga bulletin sang Department of Science and Technology, wala sang gina-expect nga damage kag aftershocks.
Sa nauna nga interview sang Bombo Radyo kay Office of Civil Defense (OCD) Region 6 Regional Director Raul Fernandez, ginpangabay sini sa publiko nga indi mag-panic kun may linog.
Kun yara sa sulod sang building, dapat nga dumdumon ang “duck, cover, and hold.” Dapat magpalayo sa mga mga kristal ukon glass windows ukon mabug-at nga mga bagay. Kun mag-untat na ang pagtay-og, dapat nga magguwa sa building kag magkadto sa designated evacuation area.
Kun yara naman sa guwa sang balay ukon building, dapat magpalayo sa mga estruktura ukon edipisyo, poste, kag landslide-prone areas.
Kun yara naman sa salakyan, dapat magpundo anay, kag magguwa sa salakyan.
Indi ini mapaktan kun san-o mag-abot gani nga nagapanawagan ang opisina nga seryosohon gid ang pag-upod sa mga earthquake drills.
May patigayunon nga National Simultaneous Earthquake Drill sa Hunyo 18 nga pagapangunahan sang OCD kag National Disaster Risk Reduction and Management Council (NDRRMC) agud nga mahibaluan sang publiko kun ano ang himuon sa tion nga may linog.
