NEW ZEALAND- Disiplina kag batasan sang mga pumuluyo ang rason kun ngaa nalab-ot na sang New Zealand ang Coronavirus disease 2019 ukon Covid-19 free status.
Sa interview sang Bombo Radyo kay Bombo International Correspondent Tess Trivilegio Cedro Peeters direkta sa Oakland, New Zealand, iya ginpahayag nga halos tanan nga tawo ang disiplinado kag nagasunod sa protocol nga ginapatuman sang gobyerno kag ilisipon gid lang ang nagalapas.
Suno kay Peeters, bangud nga covid-free na ang New Zealand, balik na sa normal ang pangabuhi sang mga tawo sa diin wala na sang restrictions magluwas lang sa pag-obserbar sang social distancing nga ginapatuman.
Mahimo naman nga makapatigayon sang mga parties kag pagtililipon kag mahimo man nga makapadulong sa simbahan para magtambong sa misa.
Sa pihak sini, magapabilin sa gihapon ang pagpatuman sang border restrictions sa diin dumilian ang pagsulod sang mga dumuluong apang mahimo naman nga makasulod sa pungsod ang mga citizens ukon residente sa kondisyon nga magapaidalom ang mga ini sa 14-day quarantine.
Ginpahayag naman ni Peeters nga apisar nagbalik na sa normal ang sitwasyon, may yara naman sang ginapangatubang nga problema sa suplay sang tubig rason nga may water restrictions nga ginapatuman.
