ILOILO CITY – 26 ka slot ang natigana sa Western Visayas para sa scholarship program sang Bureau of Fisheries and Aquatic Resources (BFAR).
Sa interview sang Bombo Radyo kay Riza Chua, program coordinator, iya ginpahayag nga bukas ang nasambit nga scholarship sa senior high school graduates kag graduating students nga luyag makaeskwela sa fisheries.
Suno kay Chua, ang four-year scholarship program ang may yara sang tatlo ka program components.
Ini amo ang Fisherfolk Children Education Grant ukon para sa mga anak sang mangingisda; ikaduha amo ang Fishery Industry Leaders Grant (FILG) ukon mga honor students, kag ang ikatatlo amo ang FSP-Indigenous Cultural Communities/Indigenous Peoples (FSP-ICC/IPs) ukon miyembro sang indigenous community.
Sa 26 nga kuhaon nga scholars sa rehiyon, 20 ang FCEG, kag tag-tatlo ang FILG kag FSP-ICC/IPs.
Lakip sa mga benepisyo sang scholarship amo ang P5,000 nga monthly allowance; P2,000 nga semestral book allowance; on-the-job training; kag thesis support.
I-prayoridad man sang ahensya ang mga scholars nga makasulod sa trabaho sa tion nga sila ang makagraduate.
Natalana ang deadline sang pagpasa sang application forms sa Oktubre 30, samtang patigayunon naman ang nationwide examination sa Disyembre 5.
