Halos makompleto na ang slots sang total nga ruta sang tricycle route plan sa Iloilo City kasunod sang pag-apply sang pila ka mga tricycle drivers sang ila nga prangkisa.
Sa interview sang Bombo Radyo kay Iloilo City Councilor Sedfrey Cabaluna, chairman sang Committee on Public Safety, iya ginpahayag nga kon makompleto na, iga-evaluate kon bastante, mahimo nga dugangan, ukon may kulang sa route plan.
Suno kay Cabaluna, mahimo sa masunod nga bulan magatakop ang aplikasyon para sa mga tricycle drivers, kasunod sang pagsugod sini sang tinalikdan nga tuig, anom na ka bulan ang nagligad.
Ginpahayag man sini nga magakoordinar ang komtiba sa Traffic Transportation and Management Office (TTMO) lakip na sa mga kabarangayan agud nga mapatuman sang matalunsay ang ruta.
Gin-athag man ni Cabaluna nga sa pag-issue sang franchise, ginalantaw, evaluate, kag gina-tsekyar ang ila nga dokumento antes nga magsumpa sa representative sang Iloilo City Council.
Nagpaandam man ang natungdan sa mga colorum nga kalabanan nagapanukot sang mataas nga plete bangud wala sang ginasundan nga taripa.
Nagpahibalo man ini sa publiko nga ang tricycle nga may prangkisa ang may nakapaskil nga taripa kon sa diin, sila lang ang may kahigayunan nga makapanukot sang plete santo sa pagsulundan.
