Mahimo na nga makapauli ukon makatransact ang Authorized Persons Outside Residence (APOR), government officials kag frontline personnel sa ila kada Local Government Unit apisar wala na sang quarantine kag swab testing.
Ini matapos nagpaggwa sang Resolution 98-A ang National Inter-Agency Task Force (IATF) on Emerging Infectious Diseases.
Nasaad sa pagsulundan nga wala na ginarequire ang mga APOR kag government officials nga magpaidalom sa mandatory testing kag quarantine protocol sa kondisyon nga may yara sila sang masunod nga dokumento:
- present valid IDs nga gin-issue sang government agency
- present original ukon certified true copy sang travel authority order
- Pass symptom screening sa port sa tion sang pag-abot ukon paghalin kag
- istrikto nga naka-comply sang minimum public health standards
Sa interview sang Bombo Radyo kay Mr. Jeck Conlu, spokesperson sang COVID-19 Team sang syudad sang Iloilo, iya ginpahayag nga magatuman ang syudad sa amo nga pagsulundan.
Apang suno kay Conlu, hugot nga nagapanugyan ang Iloilo City Government sa tanan nga APOR kag government officials nga magapauli sa syudad nga magpaidalom na lamang sa Reverse transcription-polymerase chain reaction (RT-PCR).
Suno kay Conlu, libre man ang RT-PCR test sa tanan kag pagkatapos ang 24 ka oras, mahimo naman nga makuha ang resulta.
Pahayag ni Conlu, pinaagi sini, mas mapasiguro ang seguridad sang tanan.
Wala man sang pilitay suno kay Conlu ang pagpaidalom sa RT-PCR test.
