Naghatag sang tips ang doktor agud malikawan ang angsod nga isa ka sahi sang body odor ilabi na subong nga mainit ang pahanon.
Sa interview sang Bombo Radyo kay Dr. Elvin Tiangha, iya ginpahayag nga ang body odor amo ang ‘unpleasant smell’ nga nagahalin sa lawas sang tawo sa diin may yara sang ‘overgrowth’ sang bacteria.
Ang body odor ang masami nagahalin sa tiil, ilok, pribado nga bahin sang lawas, pusod, alatrasan, likod sang dulunggan kag iban pa.
Nagpanugyan man si Tiangha sang mga pamaagi agud malikawan ang body odor sa diin kalabanan sa mga ini ang makita lang sa kusina.
Suno kay Tiangha, nagpanguna diri amo ang apple cider vinegar nga isa sa pinaka-epektibo nga ‘deodorizer’.
Mahimo ini ipahid suno sa doktor sa bahin sang lawas nga may odor matapos magpaligo bangud nagabulig ini patay sang mga bacteria nga ginahalinan sang baho sa lawas.
Ikaduha nga natural remedy sang body odor amo ang Baking soda ukon cornstarch sa diin mahimo ini ipahid sa bahin sang lawas nga may baho.
Isa ini suno kay Tiangha sa epektibo nga pampadula sang balhas agud mapauntat ang pagdamo sang bacteria.
Dugang pa ni Tiangha, ang Parsley ukon ang bisan ano nga duag green kag madahon nga utan kaangay sang balunggay kag tangkong ang pila man sa mga epektibo nga remedyo sang body odor.
Ang mga duag green nga utan suno kay Tiangha ang may anti-bacterial kag anti-inflammatory.
Gin-abiso sang natungdan nga mas healthy kag epektibo kun kan-on ang utan nga raw ukon hilaw.
Ang pinakamaayo nga himuon suno sa doktor amo nga magpaligo adlaw-adlaw kag indi pagpabay-an nga magdugay ang balhas sa lawas.
