ILOILO CITY – Ginbawian sang kabuhi ang apprentice sang isa ka shipping company matapos nga nalumos sa Iloilo River sa Barangay Libertad, Lapuz.
Ang napatay amo si Sammy Bryle Gonzales, 22, residente sang Zone 6, Barangay Sapabongga, Zamboanga City.
Kun balik-balikan, samtang nga nagapaligo sa suba ang kaupod ni Gonzales nga si Aira Salcedo sang Zamboanga City, nagpangayo ini sang bulig bangud nga daw malumos na ini.
Gilayon nga naglumpat sa suba si Gonzales agud nga buligan siya.
Apang bangud sang mabaskog nga daludo sang tubig, nalumos si Gonzales.
Ginhingagaw pa ini dala sa ospital apang ginbawian sang kabuhi.
Samtang, si Salcedo naman ang gindala sa West Visayas State University kag yara na sa estable nga kondisyon.
