Pareho nga nagnubo ang approval and trust ratings nanday President Ferdinand Marcos Jr. kag Vice President Sara Duterte base sa resulta sang latest survey sang Pulse Asia nga gin-conduct halin sang Nobyembre 26-Disyembre 3.
Nakasaad nga nagpanaog ang approval rating ni Marcos sa 48 percent halin sa 50 percent nga iya nakuha sang Septyembre. Ang iya trust rating nag-us-os man sa 47 percent halin sa 50 percent sang amo man nga bulan.
Sa pihak nga bahin, nagtupa na lamang sa 50 percent ang approval rating para sa bise-presidente nga may double-digit ukon 10-point decrease halin sa 60 percent nga iya gin-enjoy sang Septyembre. Nagsarurot man ang iya trust rating sa 49 percent halin sa 61 percent sang nasambit nga bulan.
Sa pihak nga bahin, nakabaton si Senate President Chiz Escudero sang highest approval kag trust scores nga may 53 percent kag 51 percent.
Ang pinakamanubo naman nga ratings amo ang iya ni House Speaker Martin Romualdez nga may approval kag trust scores nga yara sa 44 percent.
Ginpatigayon ang survey kadungan sang pila ka dalagku nga developments sa pungsod kaangay sang impeachment cases nga gin-file batok kay Sara sa una nga semana sang Disyembre. Dungan man ini sa pagpakita na ni former President Rodrigo Duterte sa House Quad Committee nga naga-imbestigar sa drug war.
Natabo man ang survey sang ginpirmahan ni Marcos ang duha ka layi nga nagaplastar sang boundaries sang Philippine maritime zones agud pangapinan ang teritoryo sang Pilipinas.
Gin-conduct ang survey sa 2,400 respondents nga nagaedad 18-anyos pasaka sa bilog nga pungsod. May yara ini sang ±2 percent error margin sa 95 percent confidence level.
