Gindayaw ni Jaro Archbishop Midyphil B. Billones ang anom ka dekada nga pagpanindugan sang Bombo Radyo Philippines sa pagdul-ong sang matuod nga balita kag pagserbisyo sa publiko, kadungan sang pagselebrar sang ika-60 nga anibersaryo sang pagkatukod sang network.
Sa iya nga mensahe, ginpahayag ni Billones nga sa sulod sang 60 ka tuig, nangin tuburan ang Bombo Radyo sang kamatuora, pagpalangga, paglaum kag pagtuo paagi sa responsable nga pagwaragwag.
Suno sa arsobispo, indi lamang sa pagbalita natakos ang misyon sang Bombo Radyo kundi mangin sa mga programa nga pangkomunidad pareho sang bloodletting activities, pagbulig sa mga biktima sang kalamidad, kag iban pa nga inisyatibo nga nagahatag sang paglaum kag nagakonekta sa mga tawo paagi sa pagkabalaka.
Ginkilala man ni Billones ang paghatag sang estasyon sang espasyo sa pagpalayag sang Balaan nga Misa kag iban pa nga selebrasyon sang Simbahan, nga suno sa iya, dalan agud mapadalom pa ang pagtuo sang mga tawo.
Gin-engganyo man sang arsobispo ang pagpadayon sang Bombo sang misyon nga suno sa iya, indi lamang isa ka propesyon kundi isa ka ministeryo sang pagdul-ong sang Maayo nga Balita.
Naghalad man sang iya nga pangamuyo kag pagtamyaw sa mga nagabug-os sang Bombo Radyo Philippines, kadungan sang katuyuan nga magpadayon ang network sa pagpalapnag sang kamatuoran, pagpalangga, paglaum kag pagtuo sa kada pitik sang “Bombo.”
