Nagpaguwa sang circular letter si Jaro Archbishop Midyphil B. Billones nga nagapanawagan sa mga tumuluo nga mag-upod sa patigayunon nga “Kahublagan Kontra Korapsyon” sa masunod nga Domingo, Nobyembre 30.
Sa iya sulat, gin-engganyo ni Archbishop Billiones ang mga parokya, religious communities, mga propesyunal, business groups, kabataan, kag civic organizations nga mag-isa para sa pagpanawagan sa pagtapna sa kurapsyon.
Ginpanawagan sini ang pagpasakop sa mga aktibidad kaangay sang candle-lighting events kag pagtipon para sa pagpangamuyo.
Mahimo man mag-upod sa streaming kag photo campaigns nga may mga mensahe kontra sa kurapsyon kag magbutang sang puti nga ribbon sa guwa sang mga eskwelahan kag pampubliko nga lugar.
Ginbutang man ang pagbagting sang lingganay sang simbahan; pagpatigayon sang mga diskusyon sa mga buluthuan, parokya, kag mga komunidad; kag pagpatigayon sang sectoral mobilization para sa kamatuoran kag hustisya.
Sa Nobyembre 30 nga kadungan man sang Bonifacio Day, ginapanan-aw nga 3,000 tubtub sa 5,000 ka mga indibidwal ang magatipon halin sa Jaro Plaza kag University of the Philippines–Visayas pakadto sa Iloilo Provincial Capitol para sa protesta nga maga-umpisa sa alas tres sa hapon.
Sang Septyembre 21, matandaan nga may daku man nga hublag-protesta nga ginpatigayon sa Iloilo kun sa diin masobra sa 15,000 ka mga Ilonggo ang ang nagtipon sa amo man nga venue.
