Nagapangagda ang Archdiocese of Jaro sa pag-upod sa Solemn Pontifical Mass sa Lunes, Pebrero 2, alas otso sa aga, kadungan sang kapistahan ni Nuestra Señora de la Candelaria, ang patrona sang Western Visayas.
Pangunahan ini ni His Grace Most Rev. Midyphil B. Billones, D.D., ang Metropolitan Archbishop of Jaro.
Kadungan sini, patigayunon man ang pagbendisyon sang mga kandila.
Espesyal man ini nga adlaw bangud ini ang una nga anibersaryo sang pag-appoint kay Billones bilang ika-pito nga arsobispo kag ika-14 nga Prelate sang Archdiocese of Jaro.
“Together with the entire Parish and Archdiocese of Jaro, and the faithful of Western Visayas, let us honor Our Lady as our Patroness, Queen, and Mother—the Bearer of the True Light of the World,” post sang Archdiocese of Jaro-Commission on Social Communications.
Ginaselebrar sang mga Ilonggo ang pista ni Nuestra Señora de la Candelaria sa kada Pebrero 2. Nakasentro sa Jaro Metropolitan Cathedral ang kalabanan sa mga aktibidad kag kinaandan nga ginadugukan sang linibu-libo nga mga deboto halin sa Western Visayas kag mangin sa iban nga mga rehiyon.#
(Photo: Archdiocese of Jaro, Commission on Social Communications)
