Gina-agda sang Archdiocese of Jaro kag Mediatrix Core Group ang mga tumuluo sa pag-ugyon sa pungsodnon nga mediatrix rosary kag consecration crusade kadungan sang kapistahan ni Mary Mediatrix of All Grace subong nga adlaw, Septyembre 12.
Ang tema sang selebrasyon amo ang “Mary Mediatrix of All Grace: Leading Filipino Youth to Jesus.”
Sa interview sang Bombo Radyo kay Father Joenick Territorio, chancellor sang Archdiocese of Jaro kag parish priest of Our Lady of Peace and Good Voyage Parish sa Lapaz, Iloilo City, iya ginpahayag nga ang ini nga culminasyon amo ang consecration sang pungsod kay Hesukristo pinaagi kay Mary Mediatrix of all Grace.
Patigayunon umpisa las 3:30 karon sa hapon ang Concelebrated Mass kag ini ang pangunahan ni Archbishop Emeritus Ramon Argeulles sang Lipa Carmel Batangas.
Pagkatapos sini, patigayunon naman ang Mediatrix Rosary Crusade pinaagi sa pagsanto rosaryo sa diin dala sini ang mga masunod nga intensyon:
- Pagpaha-uli sa Santos nga kasing-kasing ni Hesus kag sa putli nga kasing-kasing ni Maria bangud sa aton mga kasal-anan.
- Pagdula sa aton pungsod kag sa kalibutan sang COVID-19 pandemic.
- Pagpangapin sa aton pungsod batok sa tuyo sang komunistang tsina nga sakupon kita.
- Kabay nga makaangkon ang aton pungsod sang mga lideres nasyonal kag lokal nga may kahadlok sa Diyos, pagpalangga sa Pilipinas, may ikasarang sa pagdumala, tampad, disente maisog kag magapamuno sa banwa bangud sa ila paghigugma kay Hesus kag Maria.
- Para sa kawsa sang Mary Mediatrix of all grace kag sa hublag sa pagdeklarar sang dogma bahin sa Universal Mediation of Mary.
Suno kay Father Territorio, tuman ka importante ang pagpangamuyo para kay Maria bangud siya ang grasya kag alagyan padulong sa Diyos para sa ginahandom nga kaluwasan sang mga tumuluo.
Bantayan ang nationwide live coverage sang Bombo Radyo para sa patigayunon nga Mediatrix Rosary Crusade umpisa las 3:30 sang hapon.
